عاجل _ الحكم بالاعدام علي قاتل نيره …ولكن السؤالكام محمد  عايش بينا وكام نيره عايشة بينا ؟ ..

كتبت د ايمي حسين

محمد راح يتعدم لامحالة وده أقصي درجات العدل ولكن….

في سؤال ياريت كلنا نفكر فيه ياتري فيه كام محمد

 عايش بينا وكام نيره عايشة بينا ؟

الولد والبنت هما الاتنين ضحايا وان كانت البنت ماتت جسدياً فالولد مات نفسياً ولسة هيموت جسديا ،

في حاجة اكبر من كدة إحنا مش واخدين بالنا منها ولازم نقف عندها ونسأل نفسنا سؤال مهم جدا

وهو اي إللي يوصل ولد متفوق دراسيا أنه يرتكب جريمة بشعة بالشكل ده وهو عارف ومتأكد أن نهايته هتكون الموت.

فتشوا عن الأهل هتلاقوا أن الاهل هما سبب رئيسي وشريك اصيل في الجريمة دي ،

التنمر والسخرية من الولد ومن حالته الإجتماعية شئ في غاية الاستفزاز وده ظهر علنا في كلامهم *

واحد زي ده بدو يتجوز بنتنا * ، والاب والام وكمان اختها كل ساعة ليهم تصريح بالله عليكم فين حزنهم علي بنتهم وفين وجع قلبهم وحسرتهم

وكأن اللي ماتت دي فرخة لدرجة أن الناس بدأت تتعاطف مع محمد ليس حبا فيه ولكن كرها في أهل البنت.

الأهل يا اما يكونوا نقمة يا اما يكونوا نعمة وطالما في أهل عديمي المسؤلية تجاه اولادهم يبقي متستغربوش أننا نلاقي كل يوم محمد

جديد ونيرة جديدة ،

محمد لسة متعدمش ونيرة لسة متقتلتش ،محمد موجود في مجمتع

بينظر للماديات والمكانة الاجتماعية علي انها رقم واحد ،

محمد موجود وسط مجتمع عنده الشهادة والمنصب العالي اهم من الأخلاق

ومش مهم تكون أخلاقه مش كويسة المهم يكون ماديا مبسوط ومرتاح ،

ونيرة لسة متقتلتش هي كمان موجودة وسط أهل عديمي المسؤلية فتحوا الباب لبنتهم عشان تدور علي طريق الشهرة ومن غير ما يعرفوا أن حتي طريق الشهرة له تمن وله ضريبة.

للاسف الشديد إحنا اصبحنا عايشين في مجتمع بيعاني من فقر الاخلاق والقيم والمبادئ وأصبح الحياء عندنا تخلف و رجعية

وأصبح الانحلال تقدم ومدنية.

كنت أتمني أن أهل نيرة يتحاكموا هما كمان بتهمة القتل النفسي وده اصعب بكتير من قتل الجسد لأن قتل الجسد بيكون مرة واحدة والقتل النفسي الف مرة .

انا مش بدافع عن محمد لكن أنا بنتقض أهل عديمي المسؤلية وكنت اتمني من اهل البنت أنهم يسكتوا وكفاية تصريحات لانكم اسأتم لبنتكم وقتلتوها مرتين

وكان هدفكم الشو الإعلامي اللي الناس كلها ومنهم انا بقينا بنكره نشوفكم علي هيك حاله.

نصيحة مني للأهل…

لو جالك ولد طالب ايد بنتك ولقيته علي دين وخلق وافق عليه لأن ده هو اللي هيراعي ربنا في بنتك

وهو ده اللي هيكون عكاز وسند ليها

سيدنا محمد صلى الله عليه وسلم قال*من ترضون دينه وخلقه *

مقالش فلوسه ولا مكانته الإجتماعية ، زوجوا بناتكم للي يتقي ربنا فيهم مش لازم يكون غني ولا دكتور ولا مهندس وانتوا شايفين المهندس والدكتور وحتي كمان القاضي بيقتلوا بنات الناس ،

بناتكم واولادكم وصية وأمانة مش هتقدروا تحافظوا عليهم يبقي بلاش تخلفوهم ،

مش هتعرفوا تربوهم يبقي بلاش تخلفوهم ،

صاحبوا أولادكم وقربوا منهم وعرفوهم الصح من الغلط ، كونوا ليهم كتاب مفتوح فاهمينكم وفاهمينهم ، احتووهم قبل ما تلاقي فيهم محمد أو نيرة قبل ما تلقوا الكره ليكم في عيونهم .
والله المستعان