كتبت د. ايمي حسين
العدسه ف مصر سواء افلام او مسلسلات او اعلانات بتبقى موجهه ب شكل ي يغير تفكير المجتمع .. الشعب منعزل قدام السوشيل ميديا و الشاشات و مبقاش يحتك ب الواقع ف بقى اي حاجه يستقبلها من ورا الشاشه بيتربى عليها .. حكايه مسلسلنا
يااللي من النوع ده مش مهم يتصرف علي السيناريو او يتعبو عليه بدام هيا بتخدم هدف معين و الهدف ده هوا ال حضرتك ذكرتو ف الاعلان بتاع المسلسل
فى مشهد مستفز الحقيقة شوفته لمسلسل اسمه قواعد الطلاق ال45
تعالوا شاركونا الرأي
بكل بساطة العريس عرف أن ست البنات عروسته بتخونه وبالصور والمستندات الشيقة، الواد الصراحة طلع شهم وراجل وكمل وكتب الكتاب بعد ما واجهها بالخيانة اللى اسم الله عليها مانكرتهاش خالص ، ولا بدت ٣٪ ندم عليا ابدا، اعتزرت ليه كأنها داست على صوباعه وبررت بكلام خايب كتبه بشكل لولبي السيناريست واللى بالصدفة ميكلفش الا ٣ جنية عبقرية ومجهود .
قوم ايه بعد كتب الكتاب العريس قرر يمشي وشاف أن كفاية عليه انها مفضحهاش قال يعنى لما يكتب ويمشى كدا الدنيا تمام .
شوفت كل الهرى ده سيبك منه ، تعالى نكمل اللى حصل بعد كدا أن البنت قررت أنه بجاحة ببجاحة بقى هتكمل الفرح اللى كان ممكن تلغيه وتقول اى حاجة للناس،لكنها قررت أن محدش ليه عندها حاجة وطظ فى الناس وقامت ترقص هى واصحابها عادى جدا وتعيش حياتها طالما كلفنا ودفعنا تمن القاعة .
كل ده مش مهم !!
المهم انا عايزة أعرف الكاتب أو المؤلف كان عايز يوصل ايه بالظبط أو ايه اللى استفادته لما كملت ببجاحة ومن غير ادني شعور بالندم على الخيانة أو الزعل على شكلها قدام الناس ، أو الصدمة من تصرفات جوزها أو رد فعل أهلها او او او … ويوووووه حاجات كتشير اووى المؤلف حب يتغاضى عنها ويعرفنا بشياكة أن كل حاجة متاحة،مباحة، وبيس وعادي ، وقشطة يعنى ده خيانة الموضوع مش كبير .
شكرا لكاتب السيناريو على الولا حاجة،
شكرا المخرج وشكر من قلب قلبي للمنتج، تحت رعاية.. سألت_الشيخ_وقال_حلال
كان ممكن اتفق معاه لو الأمور اخدت مجرى محترم وواقعية عند المهزلة دى، الجدير بالذكر بقى طريقة الإعلان عن المسلسل على السوشيال ميديا بتقول كالتالي …
(تكافح ثلاث نساء بعد طلاقهن ضد الصور النمطية للمجتمع ونظرته للسيدة المطلقة وتتحول كل منهن من امرأة أربعينية تواجه الطلاق، في مجتمع شرقي إلى امرأة تواجه المجتمع ويعملن من أجل الحصول على الحياة السعيدة… )
(تحارب ثلاث سيدات مستقلات وناجحات يوميا ضد مجتمع يهدف إلى قولبة دور المرأة وتكبيلها، ويكافحن للوصول إلى حياة أفضل. النجوم: إنجي المقدم، هيدي كرم، سالي شاهين)
فكروا فى الكلام اللى بين القوسين كويس وقولولي رأيكم يمكن انا جاهلة عن حاجة مهمة وظالمة المسلسل .
اللى اعرفه ان المطلقات بيحاربوا شكل تاني خالص من الحياة الصعبة بصراحة، غير اللى شوفته فى المسلسل خالص ، اتمنى لو هتتكلموا عن قضية زى دى، ننزل شوية لمجتمعنا وطبقاته المعروفة مش عالم موازي للمشكله .
