كتب أيمن نور الدين
انتى عارفه ياأمال انى من قلائل الصحفيين اللى كتبوا فى مشكلتك الأخيرة
وانى باقف جنبك رغم ان ده بيخسرنى .. فى الوقت ان اللى استفاد منك كتير ماوقفش جنبك
لكن اول مره مبقاش فى صفك
ماينفعش ياامال تخوفى جمهورك عليكى فى كل مرة وتلمحيلهم بحاجات معينة ومعروف قصدك على ايه وقصدك على مين .. وتخليهم يستعدوا شخص معين جايز وقتها مايكونش عملك حاجه ومظلوم
وأول ما ترجعيله او حتى تصطلحى معاه
أو الأمور بينكم تهدى ترجعى تقولى انتوا فهمتوا غلط دنا مش قصدى .. ده أصل عمتى اللى ماتت .. ده خطوبتى اللى اتفسخت
انتى كده حتعملى زى حدوتة اللى بيكذب فى الحقونى فالناس بعد كده ما نجدتهوش وهو بيغرق بجد
انتى جايه بعد كل الهوجة اللى عملتيها دى .. وشحن الناس وحرق دمهم وهاشتاجات ادعم امال ماهر كإن فيه حرب وبعد كده ببساطة تقولى لغط ؟
طب كنتى فين من اللغط الأيام اللى فاتت دى ؟
عيب ياامال تستخدمى الناس فى مشاكلك الشخصية واول ما المشكلة تتحل او هدفك يتحقق تتخلصى منهم وتقوليلهم بما يعنى .. روحوا انتوا دلوقتى .. ولما أعوزكم حابعتلكم تانى ..
اللى يفقد مصداقيته مع جمهوره عمره ماحيعرف يسترجعها أبدا
يعنى حاعتزل الغناء غصبن عنى ومجبره وربنا كبير و موجود والكلام الكبير ده
والناس تتعاطف معاكى وتزعل عليكى
وبعدين اصل الناس فهمت غلط دى حالتى النفسية لما تتحسن وانا حالتقى بيهم قريب ..
ايه الجو ده ؟
ماتستغبيش جمهورك ياامال
متدخليش جمهورك فى مشاكلك الشخصية ياامال .. عشان دى باين مشاكل عاطفية .. يوم فراق وخصام .. ويوم صلح وغرام
شكلك بتحبيه ياامال .. غير الصورة اللى بتحاولى توصليها للناس انك مهدده وفى خطر ومكسورة النجاح
احنا مش فى غابة .. احنا فى مصر .. فكك من جو رأفت الهجان ده اللى بتعمليه عالناس كل مايحصل اى زعل بينكم .. وركزى بقى فى حياتك .. وفى شغلك ..
ولما تستغيثى تانى .. انا حطنش
ياريت عقلك بحلاوة صوتك
