المطربة اللبنانية منار تطلب نصيبها من تركة شعبان عبدالرحيم
حالة من الجدل أثيرت فى الساعات الماضية، عقب ظهور الفنانة اللبنانية منار منذ شهر مطالبةً بنصيبها من ميراث الفنان الشعبي شعبان عبد الرحيم، الذى رحل منذ عام، بعد صراع مع المرض
من جانبها، لم تكشف “منار” فى الفيديو السابق عن تفاصيل الميراث وسبب طلبها هذا الأمر فى الوقت الحالي، والذى أثار استغراب أسرة “شعبان”.لهذا كان يجب التواصل مع الفنانة منار أثناء تواجدها فى دولتها لبنان، للكشف عن التفاصيل الكاملة لسبب طلب ميراث من ورث الفنان الشعبي شعبان عبد الرحيم.
وأكدت منار ، أنها لم تكن تعلم بورثه الفيلا من شعبان عبد الرحيم الشهور الماضية، موضحة أنها أثناء وفاته كانت تتواجد بأمريكا.
وتابعت: “أنا مكنتش أعرف حاجة بس محامي شعبان عبد الرحيم كلمني وبعتلي المستندات بس فى مشاكل فى العائلة، وعصام رافض يديني الحاجة”.
وأضافت: “لو ليا حق هاخده بالقانون، أنا منتظرة عشان أجي مصر، وفى خلافات بيني وبين عصام وفى نفس الوقت هو أخويا، وأنا مش هخسره هو وأخواته عشان الفيلا”.
وبسؤالها عن حقيقة زواجها من شعبان عبد الرحيم قالت: “هو لو عندكم فى مصر شخص قدم لشخص حاجة لازم يكون متزوج منه، فى الحقيقة أنا مش متجوزة منه، هو شخص كريم وقدم هدية لي، شعبان كان بمثابة الأب الروحي ليا”.
وأردفت: “أنا لحد دلوقتي مصدومة، وعصام حاول يخبي الموضوع، وأنا منتظرة أعود لمصر عشان أشوف بلدي التانية وعشان أشوف موضوع الفيلا أيضًا”.
على الجانب الآخر، بالتواصل مع عصام شعبان عبد الرحيم، لمعرفة حقيقة الأمر والوقوف بشكل كامل على تفاصيل الواقعة،
قال : “أنا أول مرة أسمع الكلام ده، ومش فاهم حاجة بصراحة ومصدوم لأن مش عارف هي لها حق فى ورث أبويا على أي أساس”.
وأضاف: “هي بتقول معاها مستندات وأوراق بتثبت إن ليها حق فى الورث، وأنا لو أبويا الله يرحمه عمل كدة فعلًا وكتب حاجة ليها مش هقدر أكسر كلمته فى طربته،
لأن فى النهاية هما عشرة وأبويا كان بيحبهم ومعتبرهم أسرة واحد، وإحنا زي الحاج شعبان عبد الرحيم مش بنحب المشاكل خالص”.
وكانت منار، ظهرت فى شهر ديسمبر الماضي، في فيديو عبر حسابها الرسمي على موقع التواصل الإجتماعي «فيس بوك»، لتوجه رسالة للفنان الشعبي عصام شعبان عبد الرحيم،
من أجل طلب الإرث منه، وحل الأمر سريعًا بدلًا من وصوله لساحات المحاكم.
وقالت “منار” فى الفيديو: “أنا أول مرة أطلع فيديو لايف على الفيس بوك، بس حبيت أقول موضوعين،
الأول موضوع مصر والفيلا كتير خاص، وعاوزة أوجه رسالة لعصام أنا كتير بحبك إنت وأخواتك، إنتوا ولاد شعبان عبد الرحيم هرم من أهرامات مصر، وهو كتير وقف معايا”.
وتابعت: «أما عن موضوع الفيلا والورث نتركه للقانون وفى يد المحامي أفضل وأنا عمري ما هاخد حاجة غصب عنكم، وبدل ما يوصلي كلام من هنا وهنا ياريت تكونوا واضحين».
على الصعيد الآخر، كان الفنان شعبان عبد الرحيم، قدم كليبًا مع الفنانة اللبنانية منار، بعنوان «هتجوز لبنانية»، والذى انتشر بشكل كبير وقتها.
